Ceannródaíocht Idirnáisiúnta ón nGaeltacht sa nGeilleagar Gorm

Beidh saineolas maidir le hinbhuanaitheacht na mara go mór i gceist le hócáid fhíorúil Lá Mara 2020, seimineár gréasáin mara domhanda atá á eagrú ag Údarás na Gaeltachta Déardaoin an 24^ú Meán Fómhair mar chuid den Lá Domhanda Muirí.

Beidh saineolaithe náisiúnta agus idirnáisiúnta mara ina gceann feadhna ag an ócáid, ag roinnt a gcuid saineolais agus taithí ar raon leathan ábhar cainte- an tábhachtach a bhaineann le nuálaíocht agus inbhuanaitheacht in earnáil na mara ach go háirithe.

Fiosróidh an seimineár gréasáin fairsinge an Gheilleagair Ghorm agus na buntáistí don Ghaeltacht agus d’Éirinn go ginearálta.  Tá dearcadh an tseimineáir i dtaobh gnó agus tionscail tráthúil agus cuí ós rud é go bhfuil an domhan tiomanta tabhairt faoi ghealltanais maidir le fuinneamh in-athnuaite go fonnmhar agus an ról atá ag braislí i gcúrsaí mara amach anseo agus leagfar béim faoi leith ar an ‘nGeilleagar Gorm’.   Tá ceangal gar ag inbhuanaitheacht na Gaeltachta le forbairt inbhuanaithe na mara, agus fiosróidh an seimineár gréasáin an bealach gur féidir traidisiúin phobail cois cósta agus deiseanna nua teicneolaíochta agus gnó a úsáid chun forbairt inbhuanaithe a chruthú ag leibhéal áitiúil agus náisiúnta.

Déanfaidh feirmeoir gliomach den tríú glúin, gur eolaí aeráide freisin é, cur síos ar an tábhacht atá ag an bpobal, cultúr, an cósta agus ag an aeráide ar oileáin Maine i Stáit Aontaithe Mheiriceá agus a dtionchar ar bhreis forbartha ar gheilleagar Maine.   Beidh suim faoi leith ag lucht bainte, feirmeoirí agus táirgeoirí feamainne sa gcaint ar chur i bhfeidhm na gcaighdeán cuí maidir le baint inbhuanaithe feamainne atá fiáin agus feirmshaothraithe agus na deiseanna breis luacha chun tuilleadh post agus saibhreas a chruthú as feamainn.  Is féidir bia mara feirmshaothraithe a úsáid chun cabhrú le gníomhú aeráide agus is féidir le earnáil rathúil mara tacú le slándáil an tsoláthair bhia agus sláinte phoiblí.

Tá Lá Mara á óstáil ag Údarás na Gaeltachta don dara bliain tar éis ócáid tionscnaimh iontach a reáchtáil ag Páirc na Mara i gCill Chiaráin in 2019.  Rinneadh ceiliúradh ar chuile ní a bhain leis an bhfarraige, idir tógáil currach, baint feamainne, fuinneamh in-athnuaite agus úsáid coiréil mar fheiste leighis, tá Lá Mara anois mar chuid lárnach d’fhéilire mara na hÉireann.  De bharr srianta COVID-19 beidh lucht féachana idirnáisiúnta anois in ann blaiseadh a fháil den obair a dhéanann Údarás na Gaeltachta chun tacú le hearnáil na mara i gceantair Ghaeltachta na hÉireann.

De bharr na tréimhse éiginnte seo tá breis béime leagtha ar thábhacht na hearnála mara agus a ról lárnach i bpobail na Gaeltachta agus na hÉireann.  Caithfear aird agus nuálaíocht suntasach a dhíriú ar inbhuanaitheacht na n-acmhainní nádúrtha tábhachtacha seo a chothaigh agus a bheathaigh pobail na hÉireann.  Taobh istigh de ghlúin amháin, tá saol ar chósta na hÉireann athraithe ó cheann a bheathaigh teaghlach go ceann gur féidir slí bheatha a bhaint as agus gnó rathúil agus inbhuanaithe a bhunú.  Is iomaí deis fostaíochta atá cruthaithe ag earnáil na mara le himeacht na mblianta.