Preas Ráiteas

Fáiltíonn Údarás na Gaeltachta roimh an uasghrádú ar sheirbhís leathanbhanda i gceantair Ghaeltachta

Fáiltíonn Údarás na Gaeltachta roimh an obair uasghrádaithe atá déanta ag Eircom Wholesale ar roinnt malartáin sa Ghaeltacht le roinnt seachtainí anuas.

Ciallaíonn an t-uasghrádú seo go bhfuil seirbhís eVDSL ar fáil anois i gceantair áirithe Ghaeltachta agus go bhfuil luasanna de idir 30MB agus 70MB ar fáil ar chostas réasúnta sna ceantair sin agus an tairbhe á fháil ag Páirceanna Ghnó an Údaráis dá bharr.

Beidh an tseirbhís leathanbhanda seo ar fáil ó aon soláthraí a chuireann seirbhís ar fáil tríd an cábla teileafóin, m.sh., Eircom, Vodafone, BT agus araile.

Dúirt Príomhfheidhmeannach an Údaráis gur dea-scéala é seo do lucht gnó agus do phobal na gceantar sin. “Ciallaíonn sé go mbeidh riachtanais leathanbhanda mórchuid dár gcliantchomhlachtaí atá lonnaithe sna ceantair á shásamh. Fáiltím chomh maith roimh an obair uasghrádaithe a bheidh á dhéanamh ar mhalartáin i gceantair eile Ghaeltachta sna míonna amach romhainn. Leanfaidh an tÚdarás air lena iarrachtaí chun a chinntiú go bhfuil seirbhís leathanbhanda ardluais ar phraghas iomaíoch ar fáil chuig Páirceanna Gnó agus aonaid fiontraíochta an Údaráis ar fud na Gaeltachta.

Seo a leanas liosta de na malartáin Ghaeltachta a bhfuil uasghrádú déanta orthu le gairid anuas:

– Co. na Gaillimhe:

An Cheathrú Rua
Casla
Tír an Fhia
Indreabhán
Maigh Cuilinn

– Co. Dhún na nGall:

Gleann Cholm Cille
An Charraig
Páirc Ghnó Ghaoth Dobhair
An Fál Carrach
Anagaire
An Clochán Liath
Ailt an Chorráin