Ag an gcéad chruinniú idir Bord an Údaráis agus an tAire Gnóthaí Pobail, Comhionannais agus Gaeltachta, Pádraig Ó Ciardha sna Forbacha inniu, chuir comhaltaí an Údaráis in iúl go láidir don Aire go raibh sé fíorthábhachtach go bhfágfaí an fheidhm fiontair ag an Údarás nuair a dhéanfar athstruchtúrú ar an eagraíocht de thoradh na Straitéise 20 Bliain don Ghaeilge atá ar na bacáin.
Threisigh na comhaltaí chomh maith an gá atá le saoirse a bheith ag an Údarás lena chiste caipitil a chaitheamh in oiriúint do riachtanais fhostaíochta na Gaeltachta seachas de réir shrianta dochta reatha na Roinne Airgeadais.
Rinneadh cás ar leith ar son córasú a dhéanamh ar mhaoiniú na hOllscolaíochta trí Ghaeilge sa Ghaeltacht.
Chuir an tAire in iúl don Bhord gur aithin sé an ról tábhachtach a bhí ag an Údarás ó thaobh na teanga agus na fiontraíochta de, gur thuig sé an tábhacht a bhain le feidhm fiontair a bheith ag an eagraíocht isteach sa todhchaí agus go mbeadh na ceisteanna seo go léir á bplé agus á socrú nuair a thiocfaidh an Straitéis 20 Bliain don Ghaeilge ar ais faoi bhráid an Choiste Chomh-Aireachta thart ar dheireadh Mheán Fómhair.
Dheimhnigh sé go raibh cainteanna ar bun ag leibhéal Roinne agus Aireachta maidir le maoiniú na hOllscolaíochta trí Ghaeilge sa Ghaeltacht.