Tugtar eolas anseo ar an gcaoi ar féidir cúnamh airgid a fháil ó Údarás na Gaeltachta

 

Cuireann Údarás na Gaeltachta cúnamh airgid ar fáil do réimse leathan gnóthaí ar mhaithe le fostaíocht agus seirbhísí a sholáthar do phobal na Gaeltachta.

 

Braitheann incháilitheacht agus leibhéal tacaíochta aon iarratas ar shuíomh tíreolaíoch, leibhéal scileanna, an earnáil atá i gceist agus féidearthachtaí fostaíochta an tionscadail.

 

Déantar gach togra gnó a mheas ar bhonn aonarach. Ní mór do gach togra gnó a inmharthanacht, maoiniú agus poitéinseal margaíochta a léiriú, agus a thaispeáint go bhfuil an saineolas bainistíochta agus teicniúil cuí ar fáil chun an tionscal nó an tseirbhís nua a bhunú ar bhonn seasmhach. 

Iarratais

Ní mór gach iarratas ar dheontas a dhéanamh, agus cead i scríbhinn a fháil ó Údarás na Gaeltachta sula gcuirtear tús leis an tionscadal ábharthach (nó aon chuid de). Ba chóir plean gnó a chur chuig an Údarás chun an togra a mheas.

 

Le treoirlínte a fháil faoi conas plean gnó a ullmhú, cliceáil anseo. 
 

Is leis an Údarás cinneadh a dhéanamh i ngach cás aonarach faoi cé acu an gceadófar nó nach gceadófar deontas.  

Tá na leibhéil deontais do thionscadail ghnó phríobháideacha á rialú ag treoirlínte cúnaimh stáit an Aontais Eorpaigh ach amháin i gcás tograí pobail nach mbíonn tionchar acu ar an margadh oscailte agus tograí áirithe eile atá ag feidhmiú sa gheilleagar sóisialta. Caithfidh gach gnólacht a dtugann Údarás na Gaeltachta tacaíocht dó geallúint a thabhairt an Ghaeilge a chur chun cinn agus a fhorbairt ina chuid imeachtaí. Aithníonn an tÚdarás an ról ríthábhachtach atá ag na gnólachtaí seo i gcothú agus i gcothabháil na Gaeilge mar theanga an lucht oibre agus mar theanga phobail.

 

Cuireann an tÚdarás tacaíocht phraiticiúil agus seirbhísí comhairleacha ar fáil mar thacaíocht do phleananna teanga inchomhlachta.